Турција побара од Интерпол да издаде меѓународна потерница по израелскиот премиер Бенјамин Нетанјаху, во рамки на истрагата поврзана со пресретнувањето на хуманитарната флотила која пловела кон Газа.
Турскиот министер за правда Акин Ѓурлек изјави дека барањето се однесува на нападот врз активистите од хуманитарната флотила „Глобал сумуд“, која превезувала помош за Газа. Тој порача дека Анкара ќе ги искористи сите средства што ѝ стојат на располагање согласно националното и меѓународното право.
Турција претходно издаде потерници по Нетанјаху и други високи израелски функционери под обвинение за „геноцид“ поради дејствувањето на Израел во војната против Хамас во Газа. Израел категорично ги отфрла овие обвинувања.
Од кабинетот на Нетанјаху остро реагираа на потегот на Анкара и го нападнаа турскиот претседател Реџеп Таип Ердоган, оценувајќи дека Турција се обидува да ја прошири својата конфронтација со Израел и во Сирија.
Израелската страна порача дека нема да дозволи, како што наведуваат, обиди на Турција за дестабилизација на регионот и закани за неговата безбедност.
Најавата за новото барање до Интерпол е уште еден знак за влошувањето на односите меѓу Израел и Турција, кои дополнително се заострија по нападот на Хамас на 7 октомври 2023 година и последователната војна во Газа.
