Рекордните летни горештини почнуваат да ги менуваат туристичките навики во Европа, а сè повеќе патници, наместо традиционалните медитерански дестинации, избираат одмор во постудените земји на северот од континентот.
Според туристичката платформа „Триваго“, бројот на резервации од Велика Британија за јули и август, во споредба со минатата година, е зголемен за 55 проценти за Норвешка, 57 проценти за Шведска и 29 проценти за Данска. Сепак, медитеранските земји и натаму остануваат најпопуларен избор меѓу британските туристи.
Голем интерес има и за норвешкиот архипелаг Свалбард, каде што летните температури се движат меѓу седум и 12 Целзиусови степени. Туристичките компании наведуваат дека топлотните бранови во остатокот од Европа значително ја зголемиле побарувачката за патувања на Арктикот.
„Некои Американци резервираат патување за само една или две недели однапред. Интересот е навистина голем“, вели Биргите Вегсунд од компанијата „Basecamp Explorer“, која организира луксузни експедиции на Свалбард.
Трендот доаѓа по уште едно лето со екстремно високи температури. Велика Британија во јуни го забележа најтоплиот јунски ден во историјата со 37,3 степени Целзиусови, Франција го имаше најтоплиот јуни откако се водат мерења, а во делови од Шпанија температурите надминаа 45 степени.
Раст на интересот бележи и платформата „Booking.com“, особено за норвешките градови Тромсе и Реине, како и за шведските Малме и Лунд. Британскиот тур-оператор „Jet2“ соопшти дека речиси тројно го зголемил бројот на седишта на линијата Лондон–Берген, а зголемена е и побарувачката за патувања на Исланд.
Поради поголемиот број посетители, локалните туристички компании го прошируваат своето работење. Хотелот „Eleven Deplar Farm“ на Исланд соопшти дека пополнетоста од јуни до септември е речиси 30 проценти поголема отколку во 2024 година, а гостите остануваат подолго.
Силен раст на интересот бележи и норвешката туристичка компанија „Hurtigruten“, која очекува бројот на гости во текот на 2026 година да биде за повеќе од 15 проценти поголем во однос на претходната година, додека резервациите за 2027 година веќе се за повеќе од 35 проценти повисоки.
Според извршната директорка Хеда Фелин, патниците бараат активен одмор во попријатна клима и во безбедни региони.
„Во нордиските земји луѓето можат да дишат, да бидат активни и да уживаат во природата, наместо да се кријат од жештините“, изјави таа.
Посебно внимание привлекува и шведскиот Icehotel, каде што дел од туристите плаќаат за да спијат во соби со температура од минус пет степени и среде лето. Хотелот наведува дека расте интересот за таканаречениот „sleepcation“ – одмор насочен кон квалитетен сон, кој се надополнува со трендот „coolcation“, односно одмор во постудена клима.
Сепак, експертите предупредуваат дека и покрај растечкиот интерес за северните дестинации, најголемиот дел од туристите и натаму ги избираат сончевите летувалишта во јужна Европа. Воедно, предупредуваат дека нордиските земји треба внимателно да го управуваат растот на туризмот за да избегнат проблеми со прекумерна посетеност и оптоварување на локалната инфраструктура.
