Турските власти денеска го приведоа стенд-ап комичарот Дениз Ѓокташ, откако неговиот настап предизвика бројни реакции и пријави поради наводно навредување на верските чувства.
Според турската државна агенција „Анадолија“, Ѓокташ бил приведен на главниот аеродром во Истанбул по враќањето од патување во странство. Приведувањето следува неколку дена откако Обвинителството отвори истрага под сомнение дека јавно ги навредувал верските вредности.
Настапот, одржан минатиот месец во Истанбул, беше објавен на „Јутјуб“ и за кратко време собра милиони прегледи во Турција.
Провласниот весник „Сабах“ објави дека десетици гледачи поднеле пријави поради шегите поврзани со религијата, што довело до покренување истрага.
Во последните месеци турските власти отворија повеќе постапки против јавни личности поради нивни изјави или настапи оценети како навредливи. Критичарите на власта сметаат дека во земјата се стеснува просторот за слобода на изразување, додека властите тврдат дека постапуваат во согласност со законот.
Според локалните медиуми, претходно бил блокиран пристапот и до делови од настапот на Ѓокташ, објавени на социјалните мрежи, меѓу кои имало и шеги на сметка на турскиот претседател Реџеп Таип Ердоган.
