Туск предупреди: Русија веќе води хибридна војна против Полска

Полска повторно ја подигна воената готовност по новиот руски напад врз западна Украина, а премиерот Доналд Туск порача дека земјата мора да биде подготвена за различни безбедносни сценарија. Тој оцени дека Русија веќе води хибридна војна против Полска.

„Најважната задача сега е да ја подготвиме земјата за различни сценарија“, изјави Туск на прес-конференција со австрискиот канцелар Кристијан Штокер.

— реклама —

Според Туск, заканата од руски провокации е реална и Варшава повеќе не треба да се прашува дали Москва планира нешто, туку како да се подготви за можните сценарија.

Предупредувањето доаѓа на 87-годишнината од советската инвазија врз Полска, но и по нов руски напад врз западна Украина. По нападот, Полска го активирала военото воздухопловство, а аеродромите во Лублин и Жешув привремено го прекинале сообраќајот. Полската војска подоцна соопшти дека нејзиниот воздушен простор не бил нарушен.

— реклама —

Полски воен претставник изјавил дека руски дрон со млазен погон се урнал или бил соборен на украинска територија, околу четири километри од полската граница. Жителите на Лублинското и Поткарпатското војводство добиле предупредувања да се засолнат на безбедно место.

Туск во својата порака по повод 17 септември 1939 година потсети на советскиот напад врз Полска и порача дека лекцијата од тој период не смее да биде заборавена.

„Ако некој се осмели да нè нападне, ќе се соочи со решителен одговор, наш и на нашите сојузници“, порача полскиот премиер.

— реклама —

Тој како дел од она што го опишува како руска хибридна војна ги наведе дроновите, саботажите и дезинформациите на интернет. Според него, Русија повеќе не мора физички да ја премине границата за да ја загрози Полска.

Туск потсети и на неодамнешниот руски напад во близина на граничниот премин Јаходин-Дорогуск, кога биле погодени подрачје со бензинска станица и железничка инфраструктура на украинска страна, на само неколку стотини метри од Полска.

Тој истакна дека Полска денес е во поинаква позиција од 1939 година, бидејќи е членка на НАТО и Европската Унија.

Русија ги отфрла обвинувањата дека стои зад саботажи и други хибридни напади во Европа. Од НАТО претходно соопштија дека Русија ги засилува хибридните активности во Европа, но оттаму исто така беше посочено дека не гледаат непосредна закана од воен напад.