Уапсен Грк кој продавал напиток со тврдење дека може да го „измами“ алкотестот: грчката полиција заплени 99 шишиња

Грчката полиција уапси 59-годишен маж кој, според истрагата, стоел зад интернет-страница на која се рекламирал и продавал напиток за кој се тврдело дека може да влијае врз резултатите од полицискиот алкотест.

Производот, продаван под името „NO POLICE“, преку социјалните мрежи бил промовиран како средство за луѓе кои пиеле алкохол, но сакале да избегнат позитивен резултат при полициска контрола.

— реклама —

Случајот бил пријавен преку грчката државна платформа gov.gr, по што Службата за борба против електронскиот криминал започнала истрага. Полицијата утврдила дека 59-годишникот стоел зад интернет-страницата, како и дека бил поврзан со компанијата преку која се дистрибуирал производот.

— реклама —

При претрес во просториите на компанијата во Коридалос биле пронајдени и одземени 99 шишиња од напитокот. Производите биле испратени на лабораториско испитување.

Според објавените податоци, шишињата немале декларации на грчки јазик, а лабораториските анализи покажале дека напитокот содржел витамини во концентрации до шест пати повисоки од дозволените во соодветните одобрени безалкохолни пијалаци.

— реклама —

Во рекламите било наведено дека напитокот содржи витамин Ц, витамин Б6, зелен чај и кофеин, а неговата цена била 9,90 евра за едно шише.

— реклама —

Особено внимание привлекла рекламната порака со која производот се промовирал на социјалните мрежи: „Си испил премногу и не сакаш да те фатат? NO POLICE напиток“.

Случајот е предаден на надлежното обвинителство, додека грчките власти продолжуваат со истрагата.