Лишен од слобода криумчар на мигранти во близина на границата со Грција, пронајдени пет лица од Виетнам
На 23.04.2026 околу 02:30 часот, во близина на граничната линија со Грција, во атар на село Богородица, полициски службеници од Полициската станица за граничен премин и граничен надзор Богородица го лишија од слобода У.Ш. (48) од Скопје.
Тој се сомничи дека со патничко возило „тојота корола“ со италијански регистарски ознаки превезувал пет лица мигранти, сите државјани на Виетнам.
По насока на јавен обвинител, лицето е задржано во полициска станица и против него ќе биде поднесена соодветна пријава. Мигрантите се згрижени во Прифатно-транзитниот центар „Винојуг“ во Гевгелија.
