Уапсен вооружен маж во близина на Белата куќа, наводно се заканувал дека ќе го убие Трамп

Нов безбедносен инцидент ја вознемири американската јавност откако вооружен маж беше уапсен во близина на Белата куќа во Вашингтон, откако наводно им кажал на припадниците на Тајната служба дека дошол во градот за да го убие претседателот Доналд Трамп, соопшти Министерството за внатрешна безбедност на САД.

Според телевизијата Си-би-ес, осомничениот е идентификуван како Рони Јордрис Гванипа Кринос, државјанин на Венецуела. Тој бил уапсен во четвртокот вечерта на авенијата Конституција, откако припадниците на Тајната служба забележале сомнително однесување во паркирано возило.

— реклама —

Кога му се приближиле, мажот наводно им рекол дека слушал гласови кои му наредувале да дојде во Вашингтон и да го убие Трамп. При проверката било утврдено дека возилото е пријавено како украдено, а во него биле пронајдени три парчиња огнено оружје, меѓу кои и пушка, како и десетици куршуми.

— реклама —

Против него се поднесени повеќе обвиненија, меѓу кои за незаконски превоз и поседување оружје и муниција, неовластено користење моторно возило и примање украдена стока. Американските власти соопштија дека осомничениот влегол во САД преку Тексас во март 2024 година, кога бил приведен од граничната полиција, но подоцна бил ослободен. Засега не е познато дали има адвокат.

— реклама —

Доналд Трамп и претходно бил цел на неколку обиди за атентат. Во јули 2024 година беше ранет во пукање на предизборен собир во Батлер, во американската сојузна држава Пенсилванија. Напаѓачот, пукајќи од покрив на блиска зграда, уби еден учесник и рани уште две лица.

— реклама —

Во април годинава вооружен маж го проби безбедносниот кордон за време на вечерата на дописниците на Белата куќа во хотелот „Вашингтон Хилтон“, на која присуствуваа Трамп и првата дама Меланија Трамп. Осомничениот беше уапсен, а еден припадник на Тајната служба беше ранет во инцидентот.