Уапсени двајца турски државјани во Германија поради пожар во станица на „Старлинк“ во Полска

Двајца турски државјани се уапсени во Германија под сомнение дека се поврзани со пожарот во станица на сателитскиот интернет-систем „Старлинк“ во централна Полска. Полските власти се сомневаат дека станува збор за саботажа зад која стои Русија, објави Ројтерс.

— реклама —

Пожарот го зафатил енергетскиот систем и резервниот генератор на станицата, а полските власти претходно соопштија дека инцидентот можел да има цел да ги попречи интернет-услугите, вклучително и оние што ги користи украинската војска.

— реклама —

Полскиот министер задолжен за специјалните служби, Томаш Семоњак, директно ја обвини Москва за инцидентот.

„Нема сомнеж дека зад овој чин на саботажа стојат руските служби. Притоа, сè повеќе се потпираат на поединци поврзани со криминалните кругови“, изјави Семоњак на прес-конференција.

— реклама —

Функционери од повеќе земји на Европската Унија веќе со месеци предупредуваат дека Русија спроведува саботажи, кибернапади и други хибридни операции низ Европа, со цел да ја ослабне поддршката за Украина. Москва ги отфрла ваквите обвинувања како неосновани и ги опишува како антируска хистерија.

Сателитскиот интернет-систем „Старлинк“ почна да се користи во Украина во 2022 година, откако Киев побара помош во првите денови од руската инвазија. Полска претходно соопшти дека ги плаќа претплатите за услугата „Старлинк“ што ја користи Украина.