Шумскиот пожар што зафати околу 50.000 хектари и беше прогласен за најголем во поновата историја на Шпанија, најверојатно бил предизвикан од работа на тешка градежна механизација во општината Бургоондо, во покраината Авила.
Според шпанскиот весник „Ел Паис“, истрагата покажала дека механизацијата била користена и покрај забраната за работа поради исклучително висок ризик од избувнување пожари.
Истражителите утврдиле дека искри, создадени за време на градежните работи, ја запалиле околната, целосно исушена вегетација. На местото на пожарот биле пронајдени свежи траги од гасеници на багер, како и докази дека непосредно пред избувнувањето на пожарот бил користен хидрауличен чекан.
Дополнително, истрагата покажала дека багерот работел без потребното административно одобрение и без задолжителната противпожарна опрема што мора да ја поседува механизацијата која може да создаде искри.
Сопственикот и операторот на багерот се осомничени за предизвикување шумски пожар и за кривично дело против природните ресурси и животната средина, при што како отежнителна околност се наведува дека пожарот ги загрозил подрачјата во близина на населени места и предизвикал голема штета врз природните екосистеми.
Двајцата биле уапсени кратко по избувнувањето на пожарот и сослушани. Сопственикот на багерот подоцна бил пуштен да се брани од слобода по одлука на обвинителството, додека истрагата продолжува.
Според извори блиски до истрагата, сопственикот одбил да даде изјава, додека операторот тврдел дека пожарот бил предизвикан од искри што настанале од синџирите на возилото при напуштањето на теренот, а не за време на извршувањето на работите.
Сепак, изјавите на повеќе сведоци ја оспоруваат оваа верзија, бидејќи, според нив, осомничените управувале со багерот токму во моментот кога избувнал пожарот, иако во тој период важела забрана за користење ваква механизација.
Истражителите сметаат дека главната одговорност ја носи сопственикот на багерот, кој, според сомнежите, му наредил на својот вработен да продолжи со работите и покрај забраната на регионалните власти.
