Мерката „Училишна кошничка“ ќе важи до 30 септември, а Државниот пазарен инспекторат продолжува со контролите на продажните места низ Македонија. Заменик-министерот за економија и труд, Марјан Ристески, денеска во Прилеп информираше дека досега не се утврдени поголеми неправилности.
Инспекторатот има повеќе од 40 тимови што контролираат околу 600 продажни места каде што се продаваат училишен прибор и ранци. Ристески најави санкции за трговците кај кои ќе бидат утврдени прекршувања.
Мерката се спроведува трета година по ред и предвидува намалување на цените на опфатениот училишен прибор за најмалку 10 проценти кај трговците на големо и 15 проценти кај трговците на мало. Цените се споредуваат со оние од 1 јуни, а производите треба да бидат означени со посебни ознаки со старата и намалената цена.
Според пресметките на Владата, семејствата за едно дете може да заштедат од 500 до 1.500 денари, зависно од тоа што ќе купат. Доколку станува збор за две деца, заштедата може да достигне од 2.000 до 3.000 денари.
Ристески посочи дека на почетокот биле забележани пропусти со ознаките, но тие, според него, биле отстранети по укажувањата на инспекторите.
Тој се осврна и на економските показатели, посочувајќи дека БДП во вториот квартал од 2026 година пораснал за 4,3 проценти, додека годишната инфлација во јули изнесувала 2,3 проценти. Ристески најави дека Владата ќе продолжи со мерки за намалување на трошоците за граѓаните и подобрување на економските показатели.
