Скопските угостителски објекти до крајот на годината ќе треба самостојно да обезбедат контејнери за одлагање на сметот и да организираат редовно негово собирање. Ова го соопшти градоначалникот на Скопје, Орце Ѓорѓиевски, во синоќешното гостување во емисијата „Топ тема“ на ТВ Телма, каде нагласи дека повеќе нема да има толеранција за непочитување на обврските.
Ѓорѓиевски посочи дека меѓу Градот и угостителите ќе се склучуваат договори со јасно дефинирани задолженија за двете страни, со цел да се стави крај на нерегулираните практики.
Во изјавата што ја повтори во студиото, тој беше недвосмислен:
„Сите тие имаат дејност за која наплаќаат од граѓаните. Од друга страна, граѓаните си плаќаат за уредно да го одлагаат отпадот во контејнери. Не може некој да биде држен во сива зона“, изјави Ѓорѓиевски.
Градот најавува дека контролите ќе се засилат, а угостителите кои нема да се усогласат со новите правила ќе се соочат со санкции.
