Управата за јавни приходи најави интензивирање на даночните контроли во градежниот сектор, со цел откривање на „ризични состојби“ во работењето на дел од компаниите.
На мета на инспекциите ќе бидат продажбата на станови по истекот на пет години од изградбата, договори со нереално ниски продажни цени, непријавени вработени и ангажмани, големи разлики меѓу реалниот обем на изградба и пријавените приходи, издавање фактури без прибелешки во јавните книги, како и неправилна примена на механизмот за пренос на даночната обврска (reverse charge).
Како дел од Планот за подобрување на усогласеноста во градежниот сектор, кој стартуваше во јануари годинава, УЈП веќе испрати 318 персонализирани известувања до компании со повик да извршат корекција на одбивката на влезниот ДДВ во случаи кога продажбата се врши по пет години од изградбата.
Законот предвидува дека првиот промет на станови во рок од пет години од изградбата се оданочува со повластена стапка од 5% ДДВ, додека продажбата по тој рок е ослободена од ДДВ, но без право на одбивка на претходно платениот данок.
Од УЈП апелираат градежните компании доброволно да се усогласат со законските прописи за да избегнат казнени мерки и дополнителни контроли, со што, како што нагласуваат, ќе се обезбеди фер конкуренција и заштита на буџетските приходи.
