Украина бесна поради новата карта на светот

Обединетите нации усвоија нова официјална карта на светот, но начинот на кој е прикажан Крим предизвика остри реакции од Киев. Полуостровот на картата е визуелно одвоен од останатиот дел од Украина, поради што украинските власти поднесоа официјален протест.

Картата, усвоена на 4 септември, користи проекција „Equal Earth“, која има цел попрецизно да ги прикаже односите во големината на континентите и државите. Крим е означен со сива боја, додека остатокот од украинската територија е во зелена боја. Полуостровот, сепак, не е прикажан како дел од Русија.

— реклама —

Украина беше меѓу седумте земји што не ја поддржаа резолуцијата. Пратеничката Кира Рудик порача дека Киев не можел да ја поддржи бидејќи окупираниот полуостров е прикажан одвоено од Украина.

„Во 2026 година на ОН не треба да им треба потсетување: Крим е Украина. Срамота“, напиша Рудик на „Икс“. Во официјалниот приговор испратен до ОН, украинската страна ваквиот начин на прикажување го оцени како „целосно неприфатлив“.

— реклама —

Резолуцијата „Да ја исправиме картата“ ја предложи Того, со поддршка од Африканската унија, а ја поддржаа 164 држави. Нејзината цел е ОН да престане да ја користи традиционалната Меркаторова проекција, која визуелно ги зголемува областите на северната полутопка.

— реклама —

Освен Украина, пет земји биле воздржани – Естонија, Грузија, Литванија, Молдавија и Србија. Единствено САД гласале против.

Делегацијата на Европската унија при ОН ја поддржала резолуцијата, но нагласила дека таа не се однесува на суверенитетот, територијалниот статус, разграничувањето или меѓународно признатите граници на државите.

Американскиот претставник, пак, објаснил дека САД не гласале против поради прашањето за границите, туку ги обвиниле авторите на картата дека таа е дел од „радикален идеолошки проект“ поврзан со промовирање репарации.

Според меѓународното право, Крим останува дел од Украина, иако Русија го окупираше и го анектираше во 2014 година.