Украинскиот претседател Володимир Зеленски соопшти дека одобрил нови операции со долг дострел како одговор на руските напади врз Украина, најавувајќи дополнително зголемување на способностите за дејствување длабоко зад руските линии.
Зеленски по состанокот со министерот за одбрана Јевхен Хмара и главниот командант на украинската војска Михајло Драпати изјави дека се подготвува проширување на капацитетите за напади со долг дострел. Тој не откри кои би биле целите, кога би започнале операциите и какво оружје би било употребено.
Украинските сили во последните недели ги засилија нападите врз руски воени, логистички и енергетски објекти оддалечени од фронтот. Биле цел на напади рафинерии, пристаништа, воени аеродроми и логистичка инфраструктура.
На почетокот на септември Украина извршила и напади врз гасни постројки во Јамалско-ненечкиот автономен округ, на речиси 3.000 километри од украинската граница.
Зеленски ваквите дејства често ги нарекува „санкции со долг дострел“, со образложение дека целта е да се зголеми цената на војната за Русија преку напади врз објекти што ја поддржуваат нејзината воена и економска инфраструктура.
На состанокот било разговарано и за развојот на нови пресретнувачки дронови за одбрана од руските беспилотни летала со млазен погон. Зеленски наведе дека Украина веќе располага со неколку видови пресретнувачки дронови кои се покажале ефикасни во борбени услови, а сега се работи на нивно пошироко распоредување и масовно производство.
Разговорите опфатиле и промени во правилата за регрутирање странски доброволци во украинските одбранбени сили. Зеленски оцени дека на странците кои сакаат да учествуваат во одбраната на Украина треба да им биде овозможен појасен начин за приклучување кон воените единици.
Во меѓувреме Украина и Русија продолжуваат со меѓусебни напади врз енергетската, транспортната и воената инфраструктура, додека руските сили продолжуваат со напади со дронови и ракети врз украински градови и инфраструктура.
