Украина повторно доби стабилен „Старлинк“ по неколкудневни ограничувања – Трамп тврди дека Маск го активирал

Украина соопшти дека повторно е воспоставена стабилна врска преку сателитскиот систем „Старлинк“ на компанијата „Спејс икс“, по неколкудневни ограничувања што предизвикаа проблеми во воените операции, особено при користењето беспилотни летала. Враќањето на нормалното функционирање доаѓа во период на зголемени тензии меѓу Киев и Вашингтон.

Украинскиот министер за одбрана, Евгениј Хмара, изјави дека системите на Министерството за одбрана регистрирале обновување на функционалноста на „Старлинк“ и „Старшилд“, вклучително и при движење со брзини поголеми од 400 километри на час.

— реклама —

„Системите на Министерството за одбрана повторно регистрираат брзини на Старлинк и Старшилд поголеми од 400 километри на час, а врската е стабилна“, изјави Хмара.

Тој нагласи дека сателитската комуникација има клучно значење за украинските сили на фронтот, особено за операциите со дронови, логистиката и координацијата меѓу воените единици.

— реклама —

Во изминатите денови Украина пријавуваше ограничувања на користењето на терминалите „Старлинк“ при брзини поголеми од 160 километри на час. Ова, според украинските власти, ја попречувало употребата на одредени типови беспилотни летала што зависат од сателитската врска.

Украинскиот претседател Володимир Зеленски го обвини Вашингтон дека стои зад ограничувањата, а истовремено тврдеше дека американската страна во повеќе наврати не го предупредила Киев навреме за руски ракетни напади.

Белата куќа и милијардерот Илон Маск, чија компанија „Спејс икс“ управува со „Старлинк“, ги отфрлија обвинувањата дека се одговорни за ограничувањата на системот.

— реклама —

Американскиот претседател Доналд Трамп вчера изјави дека Маск повторно ја активирал мрежата „Старлинк“ за Украина.

Министерот Хмара го поздрави, како што рече, цврстиот став на украинскиот претседател во разговорите на највисоко ниво, оценувајќи дека таквиот пристап дава резултати.

Проблемите со сателитската комуникација се појавија во време на заострени односи меѓу Зеленски и Трамп, кои во изминатиот период разменија остри критики преку медиумите.

„Старлинк“ останува една од клучните комуникациски технологии за украинската армија, а неговото функционирање е особено важно за координацијата на единиците и управувањето со беспилотните системи на бојното поле.