Украинците зачудени од вежбите на НАТО: „Војната веќе не изгледа вака“

Војната во Украина покажа колку брзо се менуваат современите начини на војување, а дел од украинските и западните одбранбени претставници предупредуваат дека некои оружени системи и тактики на НАТО би можеле да застареат доколку не се прилагодат на новите услови.

Пет украински и западни одбранбени претставници за „Ројтерс“ изјавиле дека развојот на бојното поле се одвива со толкава брзина што Украина може да воведува промени за неколку недели, додека на НАТО за набавка и развој на одредени системи понекогаш му се потребни години или децении.

— реклама —

Еден од најголемите примери се беспилотните летала. Денис Штилерман, сосопственик и главен проектант на украинската компанија „Фајр поинт“, која произведува ракети и дронови, изјавил дека тенковите денес се соочуваат со сериозен предизвик бидејќи можат да бидат уништени со дрон што чини околу 5.000 долари.

Евтините дронови го менуваат начинот на војување и во други сегменти. Групи војници и поголеми конвои возила стануваат полесни цели, а украинските воени претставници велат дека присуството на дрон над бојното поле може драматично да ја промени ситуацијата за единиците на теренот.

— реклама —

Украина воедно ги пренесува искуствата од војната со Русија до сојузниците, но украински претставници оценуваат дека воената бирократија во НАТО тешко ги усвојува новите лекции. Како пример е наведено дека дел од материјалите за обука сè уште се потпираат на анализи од Втората светска војна.

Посебен проблем претставува противвоздушната и противракетната одбрана. Руските напади врз украинските градови ја покажаа зависноста на Европа од американските системи „Патриот“, додека Украина се соочува со недостиг од ракети-пресретнувачи за овие системи.

— реклама —

Поради загриженоста околу зависноста од американските системи, европските држави работат на алтернативи. Украина ја очекува испораката на новиот француско-италијански систем за противвоздушна одбрана SAMP/T-NG, кој е наменет и за пресретнување балистички ракети.

Во јули Украина и девет европски сојузници основаа коалиција за противвоздушна одбрана, во рамките на која е предвиден и заеднички развој на нов противбалистички ракетен систем.

— реклама —

Проектот „Freyja“ го развива конзорциум од околу десет компании, меѓу кои „Фајр поинт“ е главен партнер од приватниот сектор. Целта е да се создаде систем кој би бил поевтин и побрзо би се произведувал од „Патриот“, со производство под европска контрола.

„Ако потрошите 20 милијарди долари на својот систем за противвоздушна одбрана, мора да бидете независни кога станува збор за вашата безбедност“, изјавил Штилерман.