(Видео) Украински дронови погодија руска рафинерија во Самарската област

Руска нафтена рафинерија во градот Сизрањ во Самарската област била погодена во текот на ноќешниот украински напад со дронови.

Според локалните Телеграм-канали, мета на нападот била единица за преработка на нафта во рафинеријата на Rosneft.

— реклама —

Гувернерот на Самарската област, Вјачеслав Федоришчев, соопшти дека во нападот загинале две лица.

Сизрањ, трет по големина град во Самарската област, се наоѓа на околу 700 километри североисточно од украинско-руската граница.

— реклама —

Украина редовно напаѓа воена и енергетска инфраструктура длабоко на руска територија и на окупираните подрачја, со цел да ги ослабне способностите на Москва за продолжување на војната.

— реклама —

Киев смета дека енергетските објекти се легитимни воени цели бидејќи обезбедуваат гориво и финансии за руската воена машинерија.

Според извештај на Ројтерс, сè поголем број руски рафинерии во централниот дел на земјата го намалиле или целосно го запреле производството по неодамнешните украински напади со дронови.

Украинскиот Генералштаб вчера соопшти дека повторно била погодена една од најголемите руски рафинерии во близина на Кстово, при што избувнал пожар во рафинеријата Лукоил „Нижегородоргсинтез“.