Од 13 до 19 април низ државата ќе се спроведуваат засилени радарски контроли на брзината, како дел од европската акциска операција на Мрежата на сообраќајни полиции – РОАДПОЛ. Министерството за внатрешни работи најави и 24-часовен „радарски маратон“ кој ќе започне вечерва на полноќ.
Како што информираат од МВР, македонската сообраќајна полиција се приклучува на европската акција насочена кон контрола на брзото возење, при што ќе има засилени активности на терен во текот на целата недела.
„Од 13 до 19 април стартува европската акциска контрола на брзина на патиштата. Македонската сообраќајна полиција како членка на Европската мрежа на сообраќајни полиции – РОАДПОЛ се приклучува на акциската контрола со зголемени контроли за возење над дозволената брзина“, соопштија од Министерството.
Посебен акцент ќе биде 24-часовниот „маратон на брзина“, кој ќе се реализира од среда (15 април) во 00:00 часот до четврток (16 април) во 00:00 часот, со непрекинати контроли на целата територија на државата.
Од МВР посочуваат дека дел од локациите на контролите се однапред познати за возачите, со цел да се зајакне превентивниот ефект.
„Целта не е казнување, туку безбеден сообраќај. Целта е движење во рамки на пропишаните брзини, сообраќај кој спасува животи“, велат од Министерството.
РОАДПОЛ маратонот претставува заедничка акција на европските сообраќајни полиции која истовремено се спроведува на сите патишта низ Европа.
