Комитетот за светско наследство на УНЕСКО донесе одлука да го отстрани Стариот град на Виена од Листата на светско наследство во опасност. Одлуката беше усвоена на седницата што се одржа во јужнокорејскиот град Бусан.
Историското јадро на австриската престолнина беше ставено на оваа листа во 2017 година поради контроверзните планови за изградба на висококатница, за која УНЕСКО оцени дека би можела да го наруши историскиот изглед на градот.
Во меѓувреме, проектот беше изменет, а височината на планираната зграда беше намалена од 73 на помалку од 50 метри. Ревидираниот проект сè уште треба да помине постапка за процена на влијанието врз животната средина.
Стариот град на Виена е впишан на Листата на светско наследство на УНЕСКО од 2001 година поради неговата исклучителна урбана и архитектонска вредност, која опфаќа градби од средниот век, барокот, како и од крајот на 19. и почетокот на 20. век.
Со најновата одлука, на Листата на светско наследство во опасност остануваат 58 локалитети ширум светот, од кои најголем дел се загрозени поради вооружени конфликти, природни катастрофи и климатските промени.
Одлуката за Виена доаѓа во период кога Охридскиот Регион и натаму останува под засилен мониторинг на УНЕСКО. Организацијата неодамна ѝ даде дополнителен рок на Македонија за спроведување на мерките за заштита на природното и културното наследство, а предупредувањата за дивоградбите и понатаму остануваат едно од клучните прашања.
