Унгарскиот министер за одбрана Ромулус Русин-Сенди изјави дека земјата ја менува својата надворешна и безбедносна политика и сè повеќе се усогласува со своите западни сојузници, нагласувајќи дека „ја затвора вратата за Русија“.
Говорејќи на Будимпештанската конференција за енергетика и безбедност, Русин-Сенди порача дека Унгарија ќе ги штити интересите и вредностите на државата и на нејзините сојузници.
„Ја затвораме вратата за Русите. Потребно е да се води сметка за интересите и вредностите на државата и нејзините сојузници“, изјави министерот.
Тој додаде дека, откако Будимпешта почнала да се дистанцира од Москва, руските разузнавачки служби се обиделе повторно да воспостават влијание во земјата.
Според Русин-Сенди, стратешките партнерства во областа на одбраната можат да се градат исклучиво со доверливи сојузници.
„Нашите интереси во областа на безбедноста и одбраната се целосно јасни. Кога станува збор за националната безбедност, заштитата на критичната инфраструктура, сигурноста на снабдувањето и нашето членство во НАТО, нема простор за компромиси“, порача тој.
Изјавите доаѓаат по промената на власта во Унгарија, каде новата проевропска влада на премиерот Петер Маѓар се дистанцира од политиките на поранешниот премиер Виктор Орбан, кој важеше за еден од најблиските европски лидери до Москва.
Новата унгарска влада неодамна ја укина и деветмесечната забрана за работа на украинските медиуми, воведена од претходната администрација, во обид да ги подобри односите со Украина. Сепак, премиерот Петер Маѓар изјави дека Европската Унија не треба да брза со процесот на членство на Украина.
