Унгарската влада прогласи вонредна состојба поради сериозниот недостиг на вода предизвикан од долготрајната суша, соопшти министерот задолжен за заштита на животната средина, Ласло Гајдош.
Во објава на социјалните мрежи, Гајдош наведе дека индексот на суша во 66 од вкупно 84 водостопански окрузи ги надминал законски утврдените прагови, поради што биле активирани вонредни мерки.
Според него, експерти од Дирекцијата за водостопанство ќе спроведуваат посебни мерки за управување и заштита на водните ресурси на околу 74 проценти од територијата на земјата, со цел да се ублажат последиците од сушата.
Властите очекуваат со овие активности да се обезбеди поефикасно користење на водните ресурси и да се намали влијанието на екстремно сувите временски услови врз населението и земјоделството.
