Унгарија трипати крена борбени авиони по дојави за бомби во патнички летови

Унгарските воздухопловни сили денеска трипати испратија борбени авиони за придружба на патнички летала во воздушниот простор на Унгарија, по добиени дојави за поставени бомби. Два авиона што летале кон Софија безбедно слетале, соопштија надлежните служби.

— реклама —

Министерот за одбрана на Унгарија, Ромулуш Русин-Сенди, изјави дека првата интервенција била по закана за лет на „Виз ер“ од Брисел кон Софија. Борбените авиони полетале уште двапати поради летови од Прага кон Кипар и Букурешт, пренесува „Гардијан“.

— реклама —

Бугарското Министерство за транспорт соопшти дека дојави за бомби биле примени и за два лета кон Софија, од Лондон и Брисел. Двете летала безбедно слетале.

— реклама —

Меѓу авионите опфатени со безбедносните проверки бил и авион на романската авиокомпанија „ТАРОМ“, кој летал од Прага кон Букурешт. Екипажот за време на летот го испратил сигналот за општа вонредна состојба 7700, но авионот безбедно слетал во Букурешт.

— реклама —

Според објавените информации, најмалку 17 патнички авиони низ Европа денеска биле опфатени со низа закани за поставени бомби, додека од почетокот на неделата на мета на вакви дојави биле најмалку 27 авиони.