Унгарскиот парламент денеска го укина пратеничкиот имунитет на премиерот Петер Маѓар, со што се отвора патот за продолжување на истрагата против него за случај од 2024 година, поврзан со мобилен телефон фрлен во Дунав. За одлуката гласаа 139 пратеници, без гласови против или воздржани.
Истрагата се однесува на инцидент во ноќен клуб во Будимпешта во јуни 2024 година. Според обвинителството, Маѓар му го зел телефонот на маж кој го снимал, а потоа го фрлил во реката Дунав. Телефонот подоцна бил пронајден и вратен на сопственикот во исправна состојба.
Маѓар ги отфрла наводите дека сторил кривично дело и случајот го оценува како политички мотивиран. Тој претходно самиот побарал парламентот да му го укине имунитетот, со образложение дека нема што да крие.
Покрај имунитетот на премиерот, парламентот го укина и имунитетот на двајца поранешни министри од владата на Виктор Орбан – Балаш Ханко и Миклош Сештак. Против нив се водат одделни истраги поврзани со сомневања за злоупотреба на јавни средства и корупција.
Укинувањето на имунитетот само по себе не значи дека Маѓар или двајцата поранешни министри се виновни, туку овозможува истрагите против нив да продолжат. Против ниту еден од тројцата, според достапните информации, сè уште не е поднесено обвинение.
Пратениците на Фидес и на коалицискиот партнер, Христијанско-демократската народна партија, не учествувале во гласањето, оценувајќи дека постапките имаат политичка заднина.
