Унгарскиот премиер Петер Маѓар најави заострување на правилата во кривичната постапка, скратување на роковите и зајакнување на судовите и истражните органи.
Маѓар е лидер на централно-десничарската партија Тиса и актуелен премиер на Унгарија, откако неговата партија победи на парламентарните избори во април 2026 година и стави крај на 16-годишното владеење на Виктор Орбан.
Неговата влада од доаѓањето на власт најавува поширока реформа на институциите, борба против корупцијата и преиспитување на дел од системот изграден во времето на Орбан. Меѓу чекорите веќе се и промени во врвот на државните институции, како и проверки на договори склучувани од претходната власт.
Во таа рамка, Маѓар сега го отвора и прашањето за ефикасноста на кривичните постапки.
„Доаѓа заострување на прописите за кривичната постапка, скратување на процесните рокови и зајакнување на судовите и истражните органи“, напиша тој.
Маѓар оцени дека е неприфатливо поединечни кривични предмети да траат со години.
„Неприфатливо и недозволиво е завршувањето на некои кривични предмети да трае 5 до 10 години. Ќе забрзаме. И во ова“, порача унгарскиот премиер.
Во објавата тој не наведе конкретни законски измени, точни рокови или датум кога реформата би била поднесена во парламентот.
Најавата, сепак, се вклопува во пошироката политика на неговата влада за промени во институциите и за демонтирање на дел од системот воспоставен во времето на Орбан.
