Уништени 470 килограми ќебапи, плескавици и внатрешни органи пронајдени во нерегистрирана комора на приватен имот во општина Василево

Агенцијата за храна и ветеринарство (АХВ) уништила 470 килограми месни производи и внатрешни органи пронајдени во нерегистрирана комора на приватен имот во општина Василево.

— реклама —

При вонреден инспекциски надзор во месарница, официјалните ветеринари откриле 400 килограми замрзнати месни подготовки, плескавици и ќебапи, како и 70 килограми внатрешни органи. Целата количина била запленета и уништена на депонија согласно законските процедури.

— реклама —

Поради утврдените неправилности, изречена е мерка за привремено затворање на комората, а на правното лице му се изречени и парични казни за работа во нерегистриран објект и неозначување на производите.

— реклама —

Од АХВ информираат дека од јануари до август 2026 година биле спроведени вкупно 74.838 инспекциски надзори. Во истиот период биле уништени 69.776 килограми небезбедна храна од домашниот промет и увозот, бил забранет увоз на 21.105 килограми небезбедна храна од неживотинско потекло, а во земјите на потекло биле вратени пратки со вкупно 122.602 килограми храна од животинско потекло.

Агенцијата најавува дека контролите ќе продолжат низ целата држава, со цел заштита на здравјето на граѓаните и спречување на продажбата на небезбедна храна.