Условни казни за полицајците од „Пулс“ кои пишувале прекршоци на непостоечка фирма

Тројца полицајци добија условни затворски казни во предметот поврзан со дискотеката „Пулс“, откако судот утврди дека во службеното работење постапувале неправилно при евидентирање на прекршоци. Судијката Лидија Петровска при изрекувањето на пресудата оцени дека обвинетите се виновни.

Кире Богатинов и Горан Лазаров се осудени на условна казна затвор од по една година, која нема да се изврши доколку во рок од три години не сторат ново кривично дело. Александар Темелков доби условна казна од две години затвор, со период на проверка од четири години.

— реклама —

Ниту обвинетите, ниту нивните бранители не присуствуваа на изрекувањето на пресудата. Во судницата беа присутни само судијката, обвинителката Спасенка Андонова, новинари и сниматели.

— реклама —

Судот утврди дека полицајците во периодот од октомври 2023 до февруари 2024 година при контроли на угостителски објекти составувале записници со неточни податоци за фирмите, при што прекршоците ги воделе на друго правно лице, наместо на вистинскиот сопственик на објектот „Пулс“.

Според образложението, тие не постапиле само формално, туку пропустите биле суштински, бидејќи не бил точно утврден носителот на дејноста, што е клучен елемент при ваквите постапки. Судијката нагласи дека службените должности биле извршувани само наизглед, без суштинска проверка и контрола.

— реклама —

По доставувањето на писмената пресуда, обвинетите имаат право на жалба пред Апелацискиот суд, а задолжени се и за плаќање судски паушал од по седум илјади денари.

Ова е прва неправосилна пресуда поврзана со случајот „Пулс“, кој произлегува од поширока истрага за работењето на објектот и постапувањето на полициски службеници. Во останатите предмети за овој случај се водат одделни постапки против повеќе обвинети.

Во најобемниот предмет, кој се однесува на трагедијата во која животот го загубија 63 лица, а над 200 беа повредени, постапката сè уште е во тек и трае изведувањето на доказите.