Уставниот суд не поведе постапка по иницијативата на политичката партија Левица за уставноста на одредбите од Изборниот законик поврзани со платеното политичко рекламирање. Претседателот на Судот, Дарко Костадиновски, по седницата изјави дека мнозинството судии останале на ставот оти станува збор за веќе пресудена работа, бидејќи истите одредби претходно биле предмет на уставно-судска оцена.
„Судот не поведе постапка. Некои од судиите останаа конзистентни на претходно заземениот став дека станува збор за res judicata, односно пресудена работа“, рече Костадиновски.
Тој, сепак, посочи дека неговото лично мислење е дека оспорените одредби се неуставни и создаваат нееднакви услови за политичките субјекти.
Костадиновски потсети дека уште пред три години го изнел ставот дека спорните одредби од Изборниот законик ги нарушуваат политичкиот плурализам и еднаквоста на политичките субјекти во изборниот процес.
„По мое длабоко убедување, овие законски решенија не создаваат фер и еднакви услови за сите учесници во изборната трка. Плурализмот не завршува со денот на изборите. Тој подразбира еднакви услови за сите политички субјекти што учествуваат во демократскиот натпревар“, изјави претседателот на Уставниот суд.
Тој го оцени како спорен и критериумот за распределба на буџетските средства за финансирање на политичките партии, кој се темели на резултатите од претходните избори.
„Ако меѓу два изборни циклуса се формира нова политичка партија, таа практично нема можност да добие средства според постојниот модел. Со тоа почнува од значително понеповолна позиција во однос на другите учесници, а тоа отвора прашања за еднаквоста на изборниот натпревар“, кажа Костадиновски.
Мнозинството судии се повикале на одлуката на Уставниот суд од 2023 година, донесена по иницијатива на лидерот на Демократскиот сојуз, Павле Трајанов. Со таа одлука било оценето дека распределбата на средствата за политичко рекламирање и медиумскиот простор според резултатите од претходните избори е уставна.
Судот тогаш заклучил дека освоените гласови претставуваат објективен критериум и дека Собранието има право да ги утврдува правилата за медиумското претставување на политичките партии.
Од Левица во иницијативата навеле дека оспорените одредби промовираат дискриминаторски пристап во однос на достапноста на медиумскиот простор и распределбата на јавните финансиски средства за платено политичко рекламирање.
По одлуката на Уставниот суд, од Левица реагираа дека не била разгледана, како што наведуваат, дискриминацијата врз партијата. Според нив, актуелната состојба е различна од онаа за која Судот одлучувал во 2023 година.
Од Левица посочуваат дека тогаш немало парламентарна партија која била исклучена од платеното политичко рекламирање, додека во 2025 година, според нив, таква ситуација постоела со Левица.
Партијата најави дека ќе продолжи да го отвора прашањето за еднаквите услови за политички натпревар и функционирањето на институциите.
