Агенцијата за храна и ветеринарство (АХВ) ги демантираше информациите објавени во дел од интернет порталите дека институцијата потврдила оти животното заловено во скопската населба Козле не е волк, туку куче кое било чувано како домашен миленик.
Од АХВ велат дека тие не дале таква изјава и најавија вонреден инспекциски надзор во Зоолошката градина во Скопје за да се утврди за какво животно станува збор.
„Агенцијата за храна и ветеринарство (АХВ) ги демантира наводите објавени во неколку интернет портали дека АХВ дало изјава во врска со вчера вечер заловеното животно во скопската населба Козле, за кое се претпоставуваше дека е волк, односно дека истото е домашен миленик – куче, кое е чипирано и кое сопственикот бара да му биде вратено“, велат од АХВ.
Оттаму додаваат дека официјални ветеринари ќе извршат контрола во ЗОО-Скопје.
„Од страна на официјални ветеринари на АХВ во текот на денот ќе биде спроведен вонреден инспекциски надзор во зоолошката градина со цел утврдување на видот на заловеното животно и неговиот здравствен статус“, соопшти АХВ.
Претходно, од Зоолошката градина-Скопје информираа дека во Козле бил забележан волк кој бил чуван како домашен миленик и на себе имал синџир и каивче.
Според ЗОО-Скопје, по пријава од граѓани интервенирале МВР, Град Скопје и стручни служби од зоолошката градина, по што животното било безбедно заловено и пренесено во градината.
„За среќа, оваа ситуација заврши без последици, бидејќи станува збор за питомо и мирно животно, но уште еднаш апелираме и потсетуваме дека чување диви животни како домашни миленици е забрането и исклучително опасно“, соопштија од ЗОО-Скопје.
Од таму додадоа дека животното ќе биде сместено во карантин и под постојан здравствен надзор.
