Утре изменет сообраќаен режим во Скопје поради „Виз Ер“ скопскиот маратон

Дел од улиците и булеварите во Скопје утре од 6 до 14 часот ќе бидат затворени за сообраќај поради одржувањето на 22. Виз Ер скопски маратон. Возилата ќе се пренасочуваат по алтернативни сообраќајници, зависно од движењето на учесниците.

Затворен за сообраќај ќе биде потегот од Рекорд, односно улиците „Македонија“ и „Димитрие Чуповски“, продолжувајќи по булеварот „Митрополит Теодосиј Гологанов“ и улицата „Васил Чакаларов“ до реонот на Хром.

— реклама —

Затворени ќе бидат и делови од улицата „11 Октомври“, на потегот од Собранието кон Црвен крст, како и делови од булеварите „Крушевска Република“ и „Трета македонска бригада“, до делот кај Американ колеџ.

— реклама —

— реклама —

Во Аеродром, со посебен сообраќаен режим ќе бидат опфатени потезите кон Воен базен, Мајчин дом и булеварот „Јане Сандански“, до раскрсницата со булеварот „Србија“.

На овие сообраќајници возачите ќе треба да користат алтернативни правци, а конкретното пренасочување ќе се врши во зависност од движењето на тркачите.

Од Министерството за внатрешни работи апелираат до возачите да го избегнуваат движењето по трасите во периодот од 6 до 14 часот и да ги почитуваат наредбите и насоките на униформираните полициски службеници на терен.

Организаторите ги повикуваат граѓаните на разбирање поради привремениот сообраќаен режим и да го испланираат своето движење во недела, со користење алтернативни сообраќајни правци каде што е потребно.