Вечерва дефинитивно ќе се знае кој останува, а кој заминува од Владата на Мицкоски

Вечерва по седницата на Извршниот комитет на ВМРО-ДПМНЕ ќе бидат објавени промените во Владата.

Премиерот Христијан Мицкоски вчера изјави дека со коалициските партнери „Вреди“ и ЗНАМ постои принципиелен договор околу распределбата на ресорите, но дека персоналните решенија ќе бидат соопштени дури по седницата на партиското раководство.

— реклама —

Тој посочи дека досега не се разговарало за конкретни имиња, туку за начелна поделба на ресорите, додавајќи дека јавноста ќе биде детално информирана вечер околу 20 часот.

„Ние не сме разговарале за персонални решенија, за имиња, принципиелно имаме договор околу ресорите. Јас во минатото кажав, додека не се заврши седницата на Извршниот комитет на партијата, нема да коментирам ниту ресори ниту имиња, почекајте до отприлика 20 часот, јавноста ќе биде подетално запознаена“, изјави премиерот Христијан Мицкоски.

Според неофицијални информации, од Владата си заминуваат:

— реклама —

- Фатмир Лимани (Социјална политика, демографија и млади)
- Азир Алиу (Здравство)
- Иван Стоиљковиќ (Односи меѓу заедниците)
- Зоран Љутков (Култура)
- Игор Филков (Правда)
- Цветан Трипуновски (Земјоделство)
- Весна Јаневска (Образование).

Според изјави на претставници на коалициските партнери, по реконструкцијата „Вреди“ би требало да раководи со 6 министерства, меѓу кои за животна средина, економија, правда, евроинтеграции, култура и односи меѓу заедниците, при што дел од ресорите би добиле нови кадри.

— реклама —

Од ЗНАМ најавуваат дека ќе раководат со две министерства.

ЗНАМ ќе се „збогува“ со ресорот правда со кој сè уште раководи министерот Филков, а за возврат им е понудено министерското место во земјоделство.

И вицепремиерот и министер за односи со заедниците, Иван Стоилковиќ, преку објава на Фејсбук рече дека заминува од ова Министерство, кое го остава во добра форма; дали и кое ново место ќе го добие е неизвесно.

Копјата сега ќе се кршат кој ќе се избори за подобри директорски места.

Според најавите, предлог-составот на новата Влада ќе биде доставен до Собранието веднаш по објавата, по што ќе следува собраниска процедура за негов избор.