Прилеп од вечерва ќе биде домаќин на 23. издание на „Пиво фест“, кој ќе трае до недела и ќе понуди богата музичка програма, различни видови пиво и гастрономска понуда за посетителите од целата земја.
Во пресрет на отворањето, организаторите порачаа дека од вечерва до недела сите патишта ќе водат кон Прилеп. На „Пиво фест“ ќе настапат бројни домашни и регионални музички изведувачи, а ќе бидат организирани и алтернативна сцена, детска зона и фан-зона за фотографирање.
На површина од околу 3.000 квадратни метри ќе бидат поставени 15 штандови, меѓу кои пет пиварници што ќе понудат дваесет видови пиво, како и богата понуда на скара.
„Пиво фест“ вечерва ќе започне со настап на диџеј, по што ќе следуваат настапите на „Бонгас“, Огнен Здравковски и Џенан Лончаревиќ.
Покровител на манифестацијата е Општина Прилеп, која за организацијата издвои два милиони денари.
Градоначалникот Дејан Проданоски ги покани граѓаните од целата држава да го посетат Прилеп и порача дека сите подготовки се завршени.
„Подготвени сме за манифестацијата. Комплетната инфраструктура е поставена и подготвени сме да ги пречекаме гостите. Ќе има одлична музичка програма, разновидна храна, пиво и добра забава. Ги повикувам прилепчани, доколку се во можност, да не користат автомобили за да им се овозможи на посетителите полесно паркирање. Сите јавни претпријатија се подготвени, а безбедноста ќе биде на највисоко ниво“, изјави Проданоски.
Во следните две фестивалски вечери ќе настапат и други домашни и регионални изведувачи, а меѓу најочекуваните се Милица Павловиќ, која ќе настапи во сабота, и Јелена Розга, која ќе го затвори 23. „Пиво фест“ во недела.
