Владата на Велика Британија најави нови мерки за заштита на младите на интернет, со кои на тинејџерите од 16 и 17 години автоматски ќе им биде ограничен пристапот до социјалните мрежи во периодот од полноќ до 6 часот наутро.
Според предлогот, на уредите стандардно ќе бидат активирани и ограничувања за функциите што поттикнуваат зависност, како што се бесконечното скролање и алгоритамските препораки на содржини. Дополнително, апликациите со чет-ботови базирани на вештачка интелигенција ќе имаат задолжителни потсетници за пауза.
Британската министерка за технологија Лиз Кендал изјави дека целта е младите да имаат поквалитетен сон, подобра концентрација во училиште и повеќе време со семејството и пријателите.
Сепак, предложените ограничувања нема да бидат задолжителни. Тинејџерите ќе можат сами да ги исклучат поставките и повторно да добијат целосен пристап до социјалните мрежи, поради што дел од опозицијата оцени дека мерките нема да имаат значителен ефект.
Од друга страна, организациите за заштита на децата ја поздравија иницијативата, но предупредија дека таа мора да биде проследена со дополнителни мерки против дизајнот на платформите што поттикнува прекумерно користење.
Предлогот се надоврзува на претходно најавената забрана за користење социјални мрежи за лица помлади од 16 години, која треба да стапи во сила следната година. Новите правила, според најавите, ќе се однесуваат на платформи како TikTok, Instagram, Snapchat и YouTube, но не и на апликации за пораки како WhatsApp.
Британската влада соопшти дека пилот-проектот во кој учествувале повеќе од 300 лица покажал подобрување на квалитетот на сонот и концентрацијата кај младите што користеле ноќни ограничувања.
