Потпретседателот на САД, Џеј Ди Венс, не даде проценка кога би можел да заврши конфликтот со Иран, ниту кога цените на бензинот би можеле да се вратат на нивото пред почетокот на непријателствата. Наместо тоа, тој порача дека натамошниот тек на конфликтот во голема мера зависи од Техеран.
Венс воедно оцени дека актуелните случувања не треба да се нарекуваат војна, бидејќи, според него, активните борбени операции завршиле пред неколку месеци.
„Во моментов нема активно пукање“, изјави Венс во Белата куќа, иако во текот на оваа недела три дена по ред имаше размена на оган меѓу САД и Иран, вклучително и во близина на Ормускиот Теснец.
Ваквиот опис на ситуацијата доаѓа во период кога администрацијата на претседателот Доналд Трамп се соочува со политички притисок, особено поради зголемените цени на горивата и приближувањето на среднорочните избори во САД.
Според ажурираните податоци на Пентагон, од почетокот на конфликтот кон крајот на февруари досега се ранети 790 припадници на американската војска, а 18 загинале.
САД во вторникот спроведоа голема операција во близина на Ормускиот Теснец, при што биле погодени речиси 60 воени цели, меѓу кои системи за воздушна одбрана, радари, поморски средства, објекти поврзани со поставување мини и комуникациски локации. Во исто време, американските сили придружувале бродови низ стратешкиот воден пат.
Американската војска очекува да продолжи со офанзивните дејства во близина на Теснецот, бидејќи Иран, според американски претставници, има капацитет повторно да ги обнови своите воени способности. Еден американски функционер тековните операции ги споредил со „косење трева“ – повторување на нападите за да се спречи повторно зајакнување на иранските позиции.
И покрај оценките дека операцијата во вторникот била успешна, американските власти не очекуваат брзо решение на конфликтот. Енергетските компании и натаму се претпазливи со испраќањето бродови низ Ормускиот Теснец, дури и кога имаат воена придружба.
Конфликтот има директни последици и врз цените на горивата, што создава дополнителен политички проблем за републиканците пред изборите за Конгресот. Трамп, сепак, оваа недела изјави дека не чувствува притисок да ги прекине непријателствата пред гласањето.
Венс, кој првично се спротивставуваше на воената интервенција против Иран, претходно летово имаше водечка улога во дипломатските напори за постигнување договор. Прекинот на огнот што беше постигнат пропадна по две недели, по што повторно започнаа нападите, додека Иран се обидуваше да ја задржи контролата врз Ормускиот Теснец.
По релативно мирниот август, борбите повторно се засилија оваа недела. САД ги нападнаа иранските позиции во близина на Теснецот, за кои тврдат дека се подготвувале да постават мини во водниот пат.
Венс потврди дека администрацијата ги разгледува информациите според кои во американските напади загинале четири лица кои присуствувале на свадбена прослава во село во близина на Ормускиот Теснец. Тој не исклучи можност да има цивилни жртви, но нагласи дека американската војска намерно не таргетира цивили.
„Никогаш нема да го сториме тоа, никогаш не сме го направиле тоа и, за жал, понекогаш се случуваат работи“, рече Венс, додавајќи дека во конкретниот случај сè уште нема информации со кои би можело да се потврди или отфрли дека загинатите биле цивили.
