Вештачката интелигенција сè повеќе се користи за создавање лажни експлицитни слики од деца

Злоупотребата на вештачката интелигенција за создавање незаконски материјали со сексуална злоупотреба на деца бележи значителен раст, а бројот на откриени содржини во првата половина од 2026 година веќе го надминал вкупниот број регистриран во текот на целата 2025 година.

Организацијата Internet Watch Foundation (IWF), која следи вакви содржини на интернет, во првите шест месеци од годинава анализирала 6.310 слики генерирани со вештачка интелигенција кои, според британските закони, спаѓаат во категоријата материјали со сексуална злоупотреба на деца. Тоа е околу 40 отсто повеќе од вкупниот број од минатата година, кога биле регистрирани нешто повеќе од 4.500 слики.

— реклама —

Иако најновите податоци се однесуваат само на фотографии, од IWF посочуваат дека во последните години расте и бројот на видеоматеријали. Најголем дел од анализираните слики прикажуваат девојчиња и деца на возраст меѓу седум и 13 години.

Од IWF оценуваат дека бројките ја нагласуваат потребата од дополнителна законска регулација на вештачката интелигенција. Британскиот министер за вештачка интелигенција Канишка Нарајан изјавил дека сите можности за нови прописи остануваат отворени, при што клучното прашање треба да биде дали предложените мерки ќе ја зголемат безбедноста на граѓаните.

— реклама —

Од организацијата бараат задолжителни правила со кои технолошките компании би биле обврзани да развиваат побезбедни модели и да вградуваат механизми за спречување злоупотреба.

— реклама —

Во Велика Британија ваквите материјали се незаконски, без оглед дали се создадени со вештачка интелигенција. Забрането е и приспособување на модели со цел создавање таква содржина и нејзина дистрибуција. За развој на модел наменет за создавање хиперреалистични материјали од овој вид е предвидена затворска казна до пет години.

Дополнителна загриженост предизвикува и можноста за злоупотреба на фотографии на деца објавени на интернет. Службата Report Remove досега годинава примила 420 пријави од деца за фотографии за кои постои сомневање дека биле лажирани или изменети и претворени во експлицитна содржина. Бројот веќе го надминал вкупниот број од 397 пријави во 2025 година.

— реклама —

Поради ризикот од злоупотреба на алатките со вештачка интелигенција, Националната агенција за криминал и IWF ги повикуваат родителите и старателите да бидат внимателни со објавувањето фотографии од своите деца на социјалните мрежи. Тие препорачуваат профилите да бидат поставени како приватни и фотографиите да се споделуваат само со ограничен круг блиски лица.