Пожарот во Делиблатската Пескара, кој во четвртокот вечерта стигна до населеното место Шушара, е ставен под контрола, а жителите се безбедни. Во гаснењето и натаму интензивно се користи рускиот противпожарен авион „Иљушин“, чии воздушни интервенции значително помогнале во борбата со огнената стихија.
Од „Војводинашуме“ информираат дека борбата со пожарот околу Шушара траела цела ноќ, откако огнот претходно се приближил до населеното место Гребенац.
„Борбата околу ливадите кај Шушара траеше цела ноќ. Ситуацијата се смири, а населеното место е безбедно. Пожарот помина покрај него, но со вакви температури и силен ветер ќе продолжи да се шири“, изјавил Лучијан Августин од „Војводинашуме“ за РТС.
Тој посочил дека поради висината на пламените јазици, гаснењето од воздух е единствениот ефикасен начин за справување со огнот на одредени делови од пожариштето. Според него, вчерашните налети на рускиот авион „Иљушин“ значително помогнале во сузбивањето на огнот.
Пожарот во Делиблатската Пескара трае веќе околу еден месец, а во тој период дожд паднал само двапати, и тоа во траење од околу половина час. Од „Војводинашуме“ велат дека за значително подобрување на состојбата е потребен обилен дожд.
Во меѓувреме, пожарот на Маглич, кој исто така се наоѓа во Србија, е локализиран за помалку од 24 часа. Таму гореле сува трева и ниска вегетација, но огнот не ги зафатил крошните на листопадните и боровите шуми.
Пожарникарите од Краљево, доброволни пожарникари и работници на „Србијашуме“ учествувале во гаснењето, а дел од единиците биле пренасочени од Столови.
Ситуацијата на Столови, сепак, останува посложена. На три делови пожарот е целосно локализиран, додека на четвртиот, на јужната падина, пожарникарите го контролираат огнот долж патот. Гаснењето го отежнуваат густиот чад, силниот ветер и непристапниот терен.
На терен е испратена и тешка механизација за пробивање противпожарни патишта, со што би се овозможил полесен пристап на возилата доколку пожарот повторно почне да се шири. Засега нема непосредна опасност огнот да стигне до станбените објекти, селските домаќинства или густите борови шуми.
