Околу 1.800 луѓе изминатиот викенд учествуваа во необична операција во северниот дел на Јапонија, при која кула тешка 360 тони беше рачно поместувана за повеќе од два метра. Станува збор за кулата на замокот Хиросаки, која се враќа кон својата првобитна позиција во рамките на голем проект за реконструкција.
Кулата привремено била поместена за да се овозможи санација на камениот ѕид врз кој се наоѓа, а кој бил оштетен во силниот земјотрес во 2015 година. Наместо да биде расклопена, за нејзиното преместување била применета традиционалната јапонска техника „хикија“, при која објектите се поставуваат на валјаци и се придвижуваат со помош на јажиња.
Во текот на викендот, тимови од по 80 луѓе наизменично влечеле јажиња долги 30 метри. Во саботата кулата била поместена за 1,13 метри, а во неделата за дополнителни 1,09 метри.
Интересот за учество бил огромен. За 1.800 достапни места пристигнале околу 8.000 пријави од Јапонија и странство, вклучително и од Европа, Северна Америка и Југоисточна Азија.
Рачното поместување ќе продолжи до крајот на август, со цел вкупно 4.100 луѓе да ѝ помогнат на кулата да се придвижи пет метри. Останатите 73 метри до планираната крајна позиција ќе ги поместат машините до крајот на годината.
Кулата на замокот Хиросаки е една од само 12-те преостанати вакви градби во Јапонија и единствена во регионот Тохоку. Замокот бил завршен во 1611 година, а денешната кула била изградена во 1810 година, откако првобитната изгорела во пожар во 1627 година.
Поради обемната реконструкција, кулата со години нема да биде отворена за посетители. Според плановите, конзерваторските работи ќе започнат откако ќе биде вратена на првобитната основа, а повторното отворање за туристи се очекува во 2033 година.
