(Видео) „Алта банка е уште еден доказ колку е криминална и арамиска власта на Мицкоски“, вели Филипче

Претседателот на СДСМ, Венко Филипче, повторно ја обвини Владата предводена од Христијан Мицкоски за одговорност во случајот со „Алта банка“, оценувајќи дека последиците од работењето на банката директно ги погодуваат граѓаните и нивните заштеди.

На прес-конференција во Собранието, Филипче потсети дека СДСМ речиси една година предупредувала за ризиците поврзани со влезот на банката во Македонија, како и за информациите објавувани во српските медиуми за наводната поврзаност на нејзините сопственици со Александар Вучиќ и сомнежите за потеклото на капиталот.

— реклама —

Тој побара одговори од премиерот Мицкоски и гувернерот на Народната банка, Трајко Славески, за тоа како бил дозволен влезот на „Алта банка“ во земјава, дали биле испочитувани сите процедури и дали било проверено потеклото на средствата со кои била купена банката.

Филипче изнесе проценка дека капиталот со кој располага банката изнесува меѓу 150 и 180 милиони евра, предупредувајќи дека постои ризик од загуби за граѓаните. Тој ги обвини Мицкоски и Славески дека сносат одговорност за настанатата состојба.

— реклама —

Особено ја посочи положбата на клиентите кои во моментов имаат ограничен пристап до своите средства, меѓу нив и околу 11.000 пензионери кои пензиите ги примаат преку оваа банка.

„Денеска експозитурите не работат, а на граѓаните не им работат ниту картичките на банкоматите. Како граѓаните ќе си ги повлечат парите?“, праша Филипче.

Тој ја критикуваше и одлуката клиентите да продолжат да ги отплаќаат кредитите и покрај ограничениот пристап до сопствените средства, прашувајќи од каде граѓаните да обезбедат пари за подмирување на обврските.

— реклама —

Лидерот на СДСМ побара да се испитаат и трансакциите што се вршат во банката, особено префрлањето средства меѓу правни лица, додека граѓаните имаат ограничени можности за располагање со своите пари. Побара и проверка на потеклото на капиталот, како и утврдување дали сопственикот на банката, Давор Мацура, престојувал во Македонија во изминатите денови.

Филипче повика Обвинителството да се вклучи во случајот и да ги испита сите отворени прашања. Најави дека СДСМ ќе поднесе иницијатива за надзорна расправа во Собранието, како и интерпелација за гувернерот Трајко Славески.

— реклама —

„Да видиме како се дојде до оваа ситуација. Ќе поднесеме интерпелација за гувернерот Трајко Славески, којшто ги остави семејствата, пензионерите, младите без своите средства и ќе побараме надзорна расправа“, порача Филипче.