(Видео) Антонио останува во своето маало: „Рибари“ му посветија портрет во Влашка Маала на прерано загинатиот другар

Ликот на трагично загинатиот Антонио Савевски отсега ќе остане на ѕид во Влашка Маала во Охрид, населбата во која живееше. Навивачката група „Рибари Охрид“, чиј член беше Савевски, наслика негов портрет во спомен на својот прерано починат другар.

Гестот доаѓа по трагичната сообраќајна несреќа во која животот го загуби охриѓанецот, спортист и кошаркарски тренер.

— реклама —

Савевски, роден во 1993 година, беше добро познат во охридската спортска јавност, а кошарката беше голем дел од неговиот живот. Најпрво како играч, а потоа и како тренер, работеше со повеќе генерации млади кошаркари.

Особено силна беше и неговата поврзаност со „Рибари Охрид“. По трагедијата, навивачката група се прости од него со емотивна порака.

— реклама —

„Со длабока тага и потиштеност ја примивме трагичната вест за нашиот прерано починат брат. Неговото дело ќе остане врежано длабоко на нашата трибина, енергијата што ја поседуваше ќе пулсира низ секој нареден стих, а неговото име вечно ќе се памети како човек со големо срце“, објавија тогаш „Рибари“.

„Почивај во мир, Антонио Савевски. Милион песни јас за тебе, милион мигови…“, порачаа од навивачката група.

— реклама —

Сега споменот за Антонио доби и свое трајно место во маалото во кое живееше – неговиот лик е насликан на ѕид во Влашка Маала.

Савевски загина во тешка сообраќајна несреќа на магистралниот пат Охрид–Кичево. Според информациите што ги објави МВР, „хјундаи гец“ со охридски регистарски ознаки удрил во кучиња скитници, потоа во металните браници на патот, по што возилото се запалило.

— реклама —

Пожарот бил изгаснат од екипа на Територијалната противпожарна единица Охрид, а во автомобилот било пронајдено телото на возачот.

View this post on Instagram