Претседателот на Левица, Димитар Апасиев, на денешната прес-конференција изјави дека не е постигнат консензус за предложените измени на Изборниот законик и најави дека неговата партија ќе го блокира процесот доколку, како што рече, во законот остане политичката дискриминација.
Апасиев истакна дека во текот на работните состаноци не бил постигнат договор за повеќе клучни прашања, меѓу кои условите за независните кандидати по одлуката на Уставниот суд, електронското гласање на дијаспората, државното финансирање на изборните кампањи и воведувањето на една изборна единица.
Според него, Левица уште од почетокот се залагала за носење целосно нов Изборен законик, наместо парцијални измени на постојниот текст, кој го оцени како „номотехничка каша“.
Тој нагласи дека учеството на Левица во работната група не значи и согласност со предложените решенија, додавајќи дека одговорноста за законските измени треба да ја преземе Министерството за правда како предлагач.
Во однос на државното финансирање на изборните кампањи, Апасиев посочи дека ставот на Левица е или да има еднакви услови за сите политички субјекти или целосно да се укине државното финансирање и да се воведат јавни дебати.
„Наместо еднакви правила, остануваат истите законски решенија кои и ОБСЕ ги оцени како спорни. Повторно за сите има средства, освен за Левица, што претставува класична политичка дискриминација“, изјави Апасиев.
Тој најави дека Левица ќе поднесе иницијатива до Уставниот суд за оценување на уставноста на членот 76-д од Изборниот законик, оценувајќи дека токму оваа одредба ја исклучува партијата од системот на државно финансирање.
„Апелираме на разумност и овој процес да не се саботира. Во спротивно, пратениците на Левица уште денес ќе го блокираат донесувањето на Изборниот законик“, порача лидерот на Левица.
Одговарајќи на новинарско прашање, Апасиев рече дека официјалниот предлог-закон сè уште не е доставен до пратениците, но очекува тоа да се случи во текот на денот поради роковите поврзани со реформската агенда.
