Маж во САД закрепнува од повеќекратни скршеници откако минатата недела беше нападнат од бизон во Националниот парк Јелоустоун, при што животното го фрлило околу два и пол метри во воздух.
Инцидентот се случил додека Карл Исом-Мекдениел шетал со својот внук. Според неговото сведоштво, бизонот првично мирно лежел, па застанал да го фотографира, по што продолжил да оди. Само неколку секунди подоцна, животното тргнало кон него.
„Го видовме бизонот како лежи и не покажуваше никаква агресивност“, изјави Исом-Мекдениел од болничкиот кревет.
Тој раскажува дека бизонот го следел околу едно дрво, а потоа силно го оттурнал и го фрлил во воздух.
„Се движат со брзина што е тешко да се замисли. Избра цел, а тоа бев јас“, изјави тој.
По нападот, Исом-Мекдениел бил пренесен во болница со повеќе скршеници во пределот на колкот. Тој вели дека имал среќа што не се здобил со уште потешки повреди.
Според Алисон Велборн од зоолошката градина „ЗуМонтана“, ваквото однесување е типично за сезоната на парење на бизоните, која трае од средината на јули до крајот на август.
„Мислам дека не направил ништо погрешно. Околностите едноставно беа несреќни“, изјави Велборн, додавајќи дека во овој период посетителите треба да бидат особено внимателни во близина на бизоните.
Управата на Националниот парк Јелоустоун соопшти дека бизонот нема да биде усмртен ниту преместен, бидејќи станува збор за диво животно кое се однесувало во својата природна средина. Со таквата одлука се согласија и експертите и повредениот турист.
