Вистинска драма се одвивала во Националниот парк Јелоустоун во САД, каде што бизон нападнал турист и со силен удар го исфрлил во воздух.
На снимката што се прошири на социјалните мрежи се гледа како мажјак бизон, кој претходно лежел на земја во рекреативна зона, ненадејно трча кон група посетители. За само неколку секунди ја минува оддалеченоста, трча околу дрвјата по еден турист, а потоа силно го удира и го исфрла во воздух.
Инцидентот се случил многу брзо, без присутните да имаат време да реагираат или да се засолнат. Засега не е познато во каква состојба се наоѓа повредениот турист, ниту што го предизвикало нападот.
Од Националниот парк Јелоустоун и претходно повеќепати ги предупредуваа посетителите да држат безбедно растојание од дивите животни, особено од бизоните, кои и покрај мирниот изглед можат да бидат исклучително брзи и агресивни кога ќе почувствуваат опасност.
Според експертите, возрасните мажјаци можат да развијат брзина до 55 километри на час, поради што приближувањето до нив претставува сериозен ризик.
