Во бразилската сојузна држава Пернамбуко најмалку четири лица, меѓу кои две деца, загинаа во свлечишта и поплави предизвикани од обилни врнежи, соопштија локалните власти.
Најтешко погодени се градовите Ресифе и Олинда, каде што свлечиштата уништија повеќе куќи и предизвикаа голема материјална штета.
Во Ресифе, 24-годишна жена и нејзиниот четиригодишен син загинаа по уривање на рид што ја затрупал нивната куќа, додека таткото и едногодишна ќерка се во тешка состојба. Во Олинда, уште две лица – жена и бебе – го загубија животот при свлечиште кое уништило станбени објекти.
Спасувачките екипи евакуираа десетици жители, а повеќе од илјада луѓе останаа без домови и се сместени во привремени засолништа. Обилните дождови продолжуваат да ја отежнуваат интервенцијата, бидејќи почвата е заситена со вода и постои ризик од нови свлечишта.
Во некои делови наврнале над 200 милиметри дожд во рок од 24 часа, што значително го надминува просекот за овој период. Во главниот град на државата се пријавени и пренасочувања на летови поради лошите временски услови.
Локалните власти прогласија вонредна состојба во повеќе општини, а централната влада најави итна помош за погодените подрачја.
