Британскиот крал Чарлс Трети се возеше во тенк за време на својата прва официјална посета на Кралскиот тенковски полк, откако во 2023 година стана негов почесен командант.
Кралот пристигна во Музејот на тенковите во Бовингтон, во англиската грофовија Дорсет, со оклопен автомобил „Ролс-Ројс“ од 1920 година. Истото возило го користеше и покојната кралица Елизабета Втора при посетата на музејот во 1997 година.
На прашањето што мисли за историското возило, Чарлс низ шега одговори дека е „многу бавно“.
За време на посетата ги разгледа поставките во музејот и се запозна со историјата на тенковите, од Првата светска војна до денес.
Подоцна им додели медали на припадниците на полкот, меѓу кои и признанија за учество во операцијата „Кабрит“ во Естонија, како и одликувања за долгогодишна служба и заслуги.
Кралот го разгледа и најновиот британски борбен тенк „Челинџер 3“, а му беа претставени и современите технологии што ги користи полкот, вклучувајќи опрема изработена со 3Д-печатење, како и извидувачки и борбени дронови.
Со заштитен шлем на главата, Чарлс на крајот седна на командантското место и се возеше во тенкот „Челинџер 2“.
