Градоначалникот на Општина Аеродром, Дејан Митески, информира дека денеска бил спречен обид за нелегално истурање градежен шут на дива депонија во Долно Лисиче.
Според него, инцидентот се случил во време кога граѓани, институции и волонтери се вклучени во акцијата „Генералка викенд“ за почиста животна средина.
„Додека граѓаните, институциите и волонтерите се обединуваат во рамки на ‘Генералка викенд’ за почиста околина, денес спречив обид за нелегално истурање градежен шут на дива депонија во Долно Лисиче“, објави Митески.
Тој оцени дека ваквото однесување е неодговорно и несовесно и треба јавно да се осуди.
„Ваквото неодговорно и несовесно однесување мора јавно да се осуди, особено во денови кога сите заедно се бориме за почиста и поздрава животна средина“, додава градоначалникот.
Случајот, како што посочи, веднаш бил пријавен во полиција и до комуналните служби.
