Случајот со видеото на „ТикТок“ на кое се гледа палење на македонското знаме е расчистен, соопшти Министерството за внатрешни работи.
Секторот за внатрешни работи Тетово, преку Одделението за компјутерски криминал, во координација со Секторот за компјутерски криминал и дигитална форензика при МВР, на 22 септември, при мониторинг на социјалните мрежи, ја забележале спорната објава.
Од МВР наведуваат дека со содржината било сторено кривично дело „предизвикување омраза, раздор или нетрпеливост врз национална, верска и друга дискриминаторска основа“, предвидено со член 319, став 1 од Кривичниот законик.
Со преземените оперативни мерки, на 23 септември бил утврден идентитетот на авторот на профилот. Станува збор за малолетно лице под 14-годишна возраст од Тетово.
Во полициските простории, во присуство на родител и претставници од Центарот за социјална работа Тетово, бил извршен службен разговор со малолетникот, при што тој го признал делото. Со согласност на родителот бил обезбеден и мобилниот телефон од кој било објавено видеото, за потребите на постапката и фотодокументирањето на доказите.
Во текот на разговорот, малолетникот посочил уште три малолетни лица кои учествувале во настанот. Од МВР информираат дека тие дополнително ќе бидат повикани во полициска станица за целосно расчистување на случајот.
По целосното документирање на предметот, до Основното јавно обвинителство Тетово ќе биде поднесен соодветен поднесок.
