Тројца членови на едно семејство го загубија животот во тешка сообраќајна несреќа што вчера се случи на регионалниот пат Полигирос – Агиос Николаос на Халкидики, јавуваат грчките медиуми.
Според информациите на „Прототема“, автомобил со молдавски регистарски таблички, во кој патувало четиричлено семејство, се судрил со цистерна.
На местото на несреќата починале мајката и едното дете, за кое грчките медиуми наведуваат дека било бебе. Таткото бил пренесен во болницата на Халкидики, но подоцна им подлегнал на тешките повреди.
Единствениот преживеан е другото малолетно дете, кое е хоспитализирано и му се укажува лекарска помош.
Возачот на цистерната не е повреден и, според информациите, се наоѓа во добра здравствена состојба.
По несреќата, на терен интервенирале пожарникари, кои со специјална опрема ги извлекле жртвите од уништениот автомобил.
Причините за трагичната сообраќајна несреќа сè уште се утврдуваат, а истрага спроведува сообраќајната полиција во Полигирос.
