Два дена по ред, околу 22:30 часот, група млади лица со мотори вандализирала училишен двор во општина Аеродром, оштетувајќи јавен простор наменет за учениците и жителите.
Според информациите од општината, лицата превртувале контејнери, оштетувале урбана опрема и оставале неред во дворот.
Надлежните информираат дека сторителите се идентификувани и дека против нив е поднесена соодветна пријава.
Од општината посочуваат дека вакви случаи на вандализам биле забележани и на други локации, каде што биле оштетувани детски игралишта, урбана опрема и други јавни содржини.
Поради зачестените инциденти, најавени се засилени контроли и надзор во соработка со Министерството за внатрешни работи, особено на локациите кои најчесто се мета на вандалски дејствија.
Од локалната самоуправа порачаа дека ваквото неодговорно однесување нема да биде толерирано и апелираа до граѓаните да пријавуваат слични случаи со цел заштита на јавниот имот.
