Киев денеска го одбележува Денот на жалост, додека спасувачките екипи и натаму трагаат по преживеани под урнатините, еден ден по најсмртоносниот руски воздушен напад врз украинската престолнина од почетокот на годинава.
Според градоначалникот Виталиј Кличко, во нападот загинале најмалку 30 лица, а 92 се повредени. Меѓу исчезнатите се родителите на десетгодишно момче, кое е хоспитализирано, како и 15-годишно девојче.
Во одделен напад со руски дрон врз куќа во северниот регион Суми загинале четири лица, меѓу кои жена и нејзината малолетна ќерка, соопшти Канцеларијата на главниот украински обвинител.
Низ Киев знамињата се спуштени на половина копје, додека спасувачките екипи веќе втор ден ги расчистуваат урнатините. Форензичките тимови работат на идентификација на пронајдените тела.
Украинскиот претседател Володимир Зеленски изјави дека десет лица сè уште се водат како исчезнати и дека спасувачките операции продолжуваат на три локации.
„Русија веќе нема други аргументи за оваа војна освен балистичките ракети. Путин и понатаму се обидува да ги победи станбените згради наместо да ја заврши војната“, изјави Зеленски.
Тој додаде дека во нападите се оштетени повеќе од 100 станбени згради.
Во меѓувреме, руското Министерство за одбрана соопшти дека руските сили го презеле селото Олександривка во Дњепропетровската област.
Москва тврди дека нападот врз Киев бил одмазда за украинските напади со беспилотни летала врз руска територија. Од украинска страна, пак, се наведува дека Русија продолжува со интензивни воздушни напади врз украинските градови.
И Русија и Украина негираат дека намерно гаѓаат цивилни цели.
