(Видео) „Договорот за Михаилова е само еден случај од многуте - одговорност од Тошковски затоа што никој не одговара!“, вели Наумоски

Оставка од министерот за внатрешни работи Панче Тошковски и целосно расчистување на случајот со Ива Михаилова побара членот на Извршниот одбор на СДСМ, Александар Наумоски, на денешната прес-конференција. Тој оцени дека случајот е само еден од низата настани за кои, според него, досега не е утврдена одговорност.

Наумоски порача дека случајот со, како што го нарече, договореното пуштање на Михаилова мора да биде расчистен до крај, со докази и утврдување кривична и политичка одговорност. Според него, јавноста не треба да добива политички пораки, најави и префрлање на вината, туку конкретни одговори и одговорност од сите што евентуално биле вклучени.

— реклама —

„Панче Тошковски јавно изјави дека границата е како решето. А кој раководи со МВР и кој е надлежен да ја обезбеди таа граница? Тошковски“, изјави Наумоски, барајќи оставка од министерот.

Тој обвини дека премиерот Христијан Мицкоски го штити Тошковски, а преку него и, како што рече, криминалните структури на власта. Наумоски оцени дека отсуството на одговорност е присутно и во други случаи, меѓу кои ги посочи заплената на пет тони дрога, криминалните тендери, насилството врз младите во Ново Село и трагедијата во Кочани.

— реклама —

Осврнувајќи се на случајот со Артан Груби, Наумоски праша зошто тој излегол од куќен притвор, иако претходно, според неговите наводи, при неговото враќање во земјата било посочено дека постојат сериозни безбедносни ризици и дека неговата безбедност не може да биде гарантирана во затворски притвор.

— реклама —

„Што се смени? Како тоа опасноста исчезна преку ноќ? Исто како со Михаилова“, рече Наумоски, обвинувајќи ја власта дека прави политички договори и дека правосудството се претворило во фарса.

Тој се повика и на извештајот на Европската комисија, во кој, според него, се наведува мешање на Мицкоски во правосудниот систем. Наумоски го критикуваше и односот на премиерот кон обвинителите, наведувајќи дека јавно ги навредува и им дава задачи преку медиумите и телефонски.

„Доста е театар. Вистината на виделина. Одговорност веднаш“, порача Наумоски, повторувајќи го барањето за оставка од министерот Тошковски.