(Видео) „Мицкоски најавува над 100.000 „економски работници“ – Уставен одбива да постапи за Резолуцијата“, вели Наумоски

Уставниот суд ја отфрли иницијативата на СДСМ за резолуцијата на ВМРО-ДПМНЕ и ЗНАМ, а од опозициската партија оценуваат дека со тоа се отвора прашањето за слободата на говорот, во период кога власта најавува можност за ангажирање над 100.000 странски работници.

— реклама —

На прес-конференција, членот на Извршниот одбор на СДСМ, Александар Наумоски, посочи дека одлуката на Уставниот суд била донесена два дена по најавата на Александар Николоски за ангажирање нови 50.000 странски работници годишно и еден ден по изјавата на премиерот Христијан Мицкоски дека бројката би можела да биде и поголема од 100.000.

Од СДСМ тврдат дека резолуцијата претставува обид за замолчување на партијата поради нејзините прашања за странските работници. Иницијативата била поднесена со образложение дека се повредуваат членот 16 од Уставот, кој ги гарантира слободата на говорот и јавното изразување и забраната за цензура, како и членот 10 од Европската конвенција за човекови права.

— реклама —

Наумоски оцени дека наместо суштинско разгледување на нивните аргументи, добиле, како што рече, политичко толкување. Тој упати критики и за состојбите во правосудството, обвинувајќи ја власта за политички притисоци, партизација и мешање во работата на судството и обвинителството.

— реклама —

Од СДСМ прашуваат колку странски работници договориле Мицкоски и Николоски и дали најавите за нивно ангажирање имаат врска со тоа што, според партијата, не се зголемуваат платите на домашните работници.

„СДСМ нема да замолчи“, порача Наумоски, додавајќи дека партијата ќе продолжи да бара одговори и да се спротивставува на, како што наведуваат, обидите за цензура и партиска контрола врз институциите.